REFUGEE

நாடாளுமன்றத் தேர்தலில் ஜெனரல் சரத் பொன்சேகாவை முன்னிறுத்தி அன்னப்பட்சி சின்னத்தில் போட்டியிடுவது தொடர்பில் ஜே.வி.பி. முன்வைத்த கோரிக்கையை ஐக்கிய தேசியக் கட்சி முற்றாக நிராகரித்துள்ளதாகத் தெரிவிக்கப்படுகிறது.

இது தொடர்பாக ஐக்கிய தேசியக் கட்சியின் சிரேஷ்ட அங்கத்தவரும் முன்னாள் அமைச்சருமான ஒருவர் கருத்துத் தெரிவிக்கையில்,

ஜனாதிபதி பதவிக்கு ஒருவரே தெரிவு செய்யப்படுவார் என்பதற்கமையவே நாம் ஜெனரல் சரத் பொன்சேகாவை கடந்த ஜனாதிபதித் தேர்தலில் பொது வேட்பாளராக நிறுத்தினோம். ஆனால் நடைபெறவுள்ள நாடாளுமன்றத் தேர்தலிலும் ஜெனரல் சரத் பொன்சேகாவை முன்னிறுத்தி அன்னப்பட்சி சின்னத்தில் போட்டியிடுமாறு எம்மைக் கோருவது வேடிக்கையானதொரு விடயம்.

இந்த நாட்டில் சக்திவாய்நத கட்சியாகவும் வாக்குப் பலமிக்கதாகவும் எமது ஐக்கிய தேசிய கட்சி உள்ளது. எமது யானைச் சின்னம் கூட மக்கள் மனதில் பதிந்துள்ளது. ரணில் விக்கிரமசிங்க உட்பட மேலும் பலர் எமது கட்சியில் முதன்மை வேட்பாளராகப் போட்டியிடும் தகுதியைக் கொண்டுள்ளனர். ஆகவே இவர்களை விட்டு வெளியே வேறு யாரையும் தேட வேண்டிய தேவை எமக்கு இல்லை. அது போன்றே எமது கட்சிச் சின்னத்தை நாம் அழிந்து போக விட மாட்டோம்.

எதிர்வரும் நாடாளுமன்றத் தேர்தலில் ஐக்கிய தேசிக் கட்சி அதனுடன் கூட்டுச் சேரும் கட்சிகளுடன் இணைந்து யானைச் சின்னத்திலேயே போட்டியிடும். இதில் இரண்டாம் கருத்துக்கு இடமில்லை. ஆனால் எம்முடன் இணைந்து போட்டியிடும் கட்சிகளுக்குச் சில இடங்களை விட்டுக் கொடுப்பது என்பது வேறு விடயம்.

நடந்து முடிந்த ஜனாதிபதித் தேர்தலின் முடிவுகளை எடுத்துப் பார்த்தால் தென்னிலங்கையில் ஐக்கிய தேசியக் கட்சிக்கான ஆதரவு அதிகரித்துள்ளதனைக் காணக் கூடியதாகவுள்ளது. ஆனால் ஜே.வி.பி. க்கு மக்கள் ஆதரவு குறைந்துள்ளது. தெற்கில் அவர்களது கோட்டைகள் சரிந்துள்ளன.

அவர்களது சரிவை எமது கட்சியே இன்று சமப்படுத்தியுள்ளது இந்த உண்மையை அவர்கள் மூடி மறைக்கப் பார்க்கிறார்கள். இந்த நிலையில் நாடாளுமன்றத் தேர்தலில் ஜெனரல் சரத் பொன்சேகாவை முன்னிறுத்தி அன்னப்பட்சி சின்னத்தில் போட்டியிடுமாறு ஜே.வி.பி. எம்மைக் கோருவதானது அவர்களது தோல்வியை மறைக்க எம்மைப் போர்வையாகப் பயன்படுத்தும் ஒரு முயற்சியே இது ஒரு போதும் நடக்காது என்றும் கூறினார்

பிரதமர் பதவியை எதிர்பார்த்து அரசுத்தரப்புக்குத் தாவியிருக்கும் எஸ்.பி. திசாநா யக்க கட்சிக்கும் நாட்டுக்கும் துரோகமிழை த்துவிட்டார். மக்கள், நாடு குறித்த சிந்தனை இருந்திருந்தால் இவ்வாறான அற்ப தீர்மானங்களை அவர் எடுத்திருக்க முடியாது என்று ஐக்கிய தேசியக் கட்சி தெரிவித்துள்ளது.

"கை' சின்னத்தை தொலைத்துவிட்டு அரசியல் அநாதைகளாக்கப்பட்டுள்ள சுதந்திரக் கட்சியினருக்கும் அவர்கள் சார்ந்த அரச தரப்பினருக்கும் யானைச் சின்னம் குறித்து பேசுவதற்கு எந்த விதமான அருகதையும் இல்லை என்றும் அக்கட்சி சுட்டிக்காட்டியுள்ளது. எதிர்க்கட்சி அலுவலகத்தில் நேற்று திங்கட்கிழமை நடைபெற்ற செய்தியாளர் மாநாட்டில் கலந்துகொண்டு கருத்து தெரிவிக்கையிலேயே அக்கட்சியின் நுவரெலியா மாவட்ட எம்.பி. ரேணுகா ஹேரத் மேற்கண்டவாறு தெரிவித்தார்.

அவர் இங்கு மேலும் கூறுகையில்,

எஸ்.பி. திசாநாயக்காவுக்கு கட்சியின் உயரிய பதவிகளுள் ஒன்றான தேசிய அமைப்பாளர் பதவி வழங்கப்பட்டிருந்தது. ஆனால், அவர் தற்போது எடுத்திருக்கும் தீர்மானமானது அற்பமானது. கட்சித் தாவல்களில் புகழ் பெற்ற முன்னாள் நிதியமைச்சர் ரொனி டி.மெல்லின் சாதனையை அவர் முறியடித்து விடுவார் போல் தெரிகிறது.

அவருடைய தர்க்கங்கள் எதுவாக இருந்தாலும் கட்சியின் செயற்குழு எடுக்கின்ற தீர்மானங்களுக்கு கட்டுப்பட வேண்டியது அவசியமாகும். ஏகோபித்த தீர்மானத்தை மாற்றியமைக்க முடியாது, எதிர்க்கவும் முடியாது.

ஜெனரல் சரத் பொன்சேகா பொது வேட்பாளராகவே நிறுத்தப்பட்டுள்ளார். இந்நாட்டிலிருந்து குடும்ப சர்வாதிகாரத்தை விரட்டியடிப்பதற்கும் அதேபோல் மக்கள் அதிகாரத்தை நிலைநாட்டுவதற்கும் தீர்மானித்தே ஜெனரல் பொன்சேகாவை ஜனாதிபதியாக்குவது என்ற தீர்மானத்திற்கு கட்சி வந்தது. நடைபெறவிருக்கும் தேர்தலானது மக்களின் கருத்துக்கணிப்பே அன்றி அது ஜனாதிபதித் தேர்தல் அல்ல என்றே கூற வேண்டும்.

ஐக்கிய தேசியக் கட்சியின் யானைச் சின்னம் குறித்து சுதந்திரக் கட்சியினர் பெரிதாக அலட்டிக் கொள்கின்றனர்.

பதவி மோகம் பிடித்து எம்மில் இருந்து பிரிந்து சென்றவர்களும் கூட இது குறித்து பேசுகின்றனர். சுதந்திரக் கட்சியினர் முதலில் கையை இழந்தனர். பின்னர் நாற்காலியையும் இழந்து இப்போது வெற்றிலையில் நிற்கின்றனர். இன்னும் சிறிது நாட்களில் வெற்றிலையையும் இழந்து காலில் விழுந்து கிடக்கப் போகின்றனர். இவ்வாறு தங்களது சின்னத்தை தொலைத்துவிட்டவர்கள் இன்று வெட்கமில்லாது எம்மைப் பற்றி விமர்சிக்கின்றனர் என்றார். இதன் போது பிறிதொரு கேள்விக்கு பதிலளித்த அவர், இந்த நாட்டுக்கு ஜனநாயகம் என்பது எமது தலைவர் ரணில் விக்கிரமசிங்கவின் யுகத்திலேயே உறுதியாகும். கட்சிக்குள் ஜனநாயகம் இல்லை என்று கூறுவது ஏற்றுக்கொள்ள முடியாது. அதேபோல் ஐக்கிய தேசிய முன்னணியில் பதவி வழங்கப்படவில்லை என்பதும் நகைப்புக்குரியது.

ஐக்கிய தேசிய முன்னணியில் எவருக்கும் எந்தப் பதவிகளும் வழங்கப்படவில்லை. குறுகிய நோக்கத்துடன் குறுகிய பாதையில் சென்று தலைமைப் பதவியை எட்டி விடலாம் என்று நினைப்பது முடியாத காரியமாகும். எனக்கு கிடைத்த தகவலின் அடிப்படையில் அவருக்கு பிரதமர் பதவியை தருவதாக ஜனாதிபதி கூறியிருப்பதாக தெரிவிக்கப்படுகிறது. எது எப்படி இருப்பினும் அவர் தனது நிலைப்பாடுகள் தொடர்பில் கட்சிக்கு எதனையும் அறிவித்திருக்கவில்லை.

பிரதமர் பதவியை எஸ்.பி. திசாநாயக்கவுக்கு வழங்குவதற்கு ஜனாதிபதி தீர்மானிப்பாரானால் இப்போதைய பிரதமர் ரட்ணசிறி விக்கிரமநாயக்க, மைத்திரிபால சிறிசேன, தி.மு. ஜயரத்ன ஆகியோரின் நிலை என்ன என்றும் அவர் கேள்வி எழுப்பினார்.

ஐக்கிய தேசியக் கட்சியின் விசேட சம்மேளனம் நாளை சனிக்கிழமை காலை 9 மணிக்கு கட்சித் தலைவர் ரணில் விக்கிரமசிங்க தலைமையில் வெலிசறை மைதானத்தில் நடைபெறவுள்ளது. இக் கூட்டத்தில் எதிரணிகளின் பொது வேட்பாளர் ஜெனரல் சரத் பொன்சேகா கலந்து கொண்டு உரையாற்றவுள்ளார். இதேபோல் எதிர்வரும் 18ஆம் திகதி வெள்ளிக்கிழமை ஜே.வி.பி. உட்பட எதிர்க்கட்சிகளின் கூட்டம் கண்டியில் இடம்பெறவுள்ளது என்று ஐ.தே.கட்சியின் பொதுச் செயலாளர் திஸ்ஸ அத்தனாயக்க தெரிவித்தார்.

கொழும்பில் நேற்று வியாழக்கிழமை இடம்பெற்ற ஊடகவியலாளர் மாநாட்டின் போதே திஸ்ஸ அத்தனாயக்க எம்.பி. இதனை அறிவித்தார். இதுகுறித்து அவர் மேலும் கூறியதாவது:எமது கட்சியை பலப்படுத்தி அரசாங்கத்தை வீட்டுக்கு அனுப்பும் செயல்பாட்டை முன்னணிப்படுத்தியும் ஜெனரல் சரத் பொன்சேகாவை வெற்றிபெறச் செய்வதற்குமாகவே இந்த விசேட சம்மேளனம் நடத்தப்படுகிறது. இச் சம்மேளனத்தில் எமது தலைமையிலான ஐ.தே. முன்னணியில் இணைந்துள்ள அனைத்துக் கட்சித் தலைவர்களும் கலந்து கொள்கின்றனர்.

கண்டியில் பிரசாரக் கூட்டம்

எதிர்வரும் 17ஆம் திகதி வேட்பு மனு தாக்கல் செய்யப்பட்டு அடுத்த நாள் 18ஆம் திகதி வெள்ளிக்கிழமை ஜெனரல் சரத் பொன்சேகாவை ஆதரிக்கும் எதிரணிகளின் முதலாவது பிரசாரக் கூட்டம் கண்டியில் நடைபெறவுள்ளது.

இக் கூட்டத்தில் ஐ.தே.முன்னணியில் இணைந்துள்ள அரசியல் கட்சிகள், அமைப்புக்கள் மற்றும் ஜே.வி.பி.யும் கலந்து கொள்ளவுள்ளது. பொது வேட்பாளர் சரத் பொன்சேகா இக்கூட்டத்தில் பிரதான உரையாற்றுவார்.

ஐ.தே.கட்சி ஜே.வி.பி.யுடன் இணைந்து பிரதான மாவட்டங்களில் 3 பிரசாரக் கூட்டங்களை நடத்தவுள்ளதோடு, ஐ.தே.முன்னணியில் இணைந்துள்ள கட்சிகள் அமைப்புக்களோடிணைந்து 90 பிரசாரக் கூட்டங்களையும் நடத்த ஏற்பாடு செய்யப்பட்டுள்ளது. அத்தோடு, பொது வேட்பாளரை ஆதரித்து ஜே.வி.பி. மற்றும் ஐ.தே.முன்னணியோடு இணைந்துள்ள கட்சிகள் தனித் தனியாக பிரசாரக் கூட்டங்களை நடத்தவுள்ளன.

ஐ.தே.கட்சியும் அனைத்து மாவட்டங்களில் கூட்டங்களை நடத்துவதோடு, வீடு வீடாகச் சென்று பிரசாரத்தையும் ஆரம்பிக்கவுள்ளது. இணைந்தோ அல்லது தனித் தனியாகவோ நாம் பிரசாரங்களை முன்னெடுத்தாலும் எமது நோக்கம் ஜெனரல் சரத் பொன்சேகாவை வெற்றி பெறச் செய்வதே ஆகும்.

ஜனாதிபதி மஹிந்த ராஜபக்ஷவின் புகைப்படத்துடன் வெளியிடப்பட்டுள்ள ஆயிரம் ரூபா தாள், நாணயத் தாள் அல்ல. அது ஒரு பிரசார சுவரொட்டியாகும் என்று ஐக்கிய தேசியக் கட்சி குற்றம் சாட்டியுள்ளது. கொழும்பில் நேற்று புதன்கிழமை இடம்பெற்ற ஊடகவியலாளர் மாநாட்டில் கருத்து தெரிவிக்கையிலேயே ஐ.தே.கட்சியின் பொதுச் செயலாளரும், எம்.பி.யுமான திஸ்ஸ அத்தநாயக்க இதனைத் தெரிவித்தார். அங்கு அவர் மேலும் கூறியதாவது,நாட்டு மக்கள் இன்று புதிய நாணயத்தாளை கோரவில்லை. வாழ்க்கைச் செலவு அதிகரிப்பிற்கேற்ப சம்பள உயர்வையும் வாழ வழியையுமே கேட்கின்றனர்.

இலங்கை மத்திய வங்கியின் நாணயங்கள் தொடர்பான சட்டங்களை மதிக்காது இந்த நாணயத்தாள் அரசியல் நிகழ்ச்சி நிரலுக்கேற்ப வெளியிடப்பட்டுள்ளது. அத்தோடு ஜனாதிபதி மஹிந்த ராஜபக்ஷ எதிர்வரும் ஜனாதிபதித் தேர்தலில் வேட்பாளராகப் போட்டியிடுகின்றார். எனவே கைகளை உயர்த்திக் கொண்டு தேர்தல் மேடைகளில் தோன்றுவதைப் போன்று நாணயத் தாள் வெளியிட்டுள்ளமையானது பிழையான அணுகுமுறையாகும். கித்சிறி மஞ்சநாயக்கமே.மா. சபை ஐ.தே. கட்சி உறுப்பினர்சர்வாதிகார ஆட்சியாளர்கள் ஆட்சி புரியும் நாடுகளிலேயே இவ்வாறான நாணயத்தாள்கள் வெளியிடப்படும். இன்று எமது நாட்டிலும் இந்த நாணயத் தாளானது ஆட்சியாளர்கள் சர்வாதிகாரத்தை நோக்கி நகர்கின்றனர் என்பது வெளிப்படுத்தப்பட்டுள்ளது என்று இங்கு கருத்து தெரிவித்த ஐ.தே.க.வின் மேல் மாகாண சபை உறுப்பினர் கித்சிறி மஞ்சநாயக்க தெரிவித்தார்.

நாணயத் தாள்களில் அரச தலைவரின் உத்தியோகபூர்வ புகைப்படத்தை அச்சிடலாம். ஆனால் கைகளை உயர்த்திய விதத்திலான புகைப்படம் தேர்தல் பிரசாரத்தையே காட்டி நிற்கின்றது.

அத்தோடு இத்தாளின் முன்புறம் நீலம், சிவப்பு கோடுகள் போடப்பட்டுள்ளமை ஆளும் கட்சியை குறிப்பிடுகின்றது. படையினருக்கு கௌரவம் அளிக்கின்றோம் என்ற பிரசாரத்தோடு தேர்தல் பிரசாரம் முன்னெடுக்கப்பட்டுள்ளது. படையினரை கௌரவிக்கும் புகைப்படம் நாணயத் தாளின் பின்புறமே அச்சிடப்பட்டுள்ளது என்றும் கித்சிறி மஞ்சநாயக்க தெரிவித்தார்.