REFUGEE

ஹெய்ட்டியை உலுக்கிய பூகம்ப இடிபாடுகளிலிருந்து 14 நாட்களின் பின்னர் 35 வயதுடைய நபர் ஒருவர் நேற்று மாலைஉயிருடன் மீட்கப்பட்டுள்ளார்.

கட்டிட இடிபாடுகளுக்குள் இருந்து இவரை மீட்டெடுத்த அமெரிக்கப் படையினர் அந்த நபர் பலத்த காயங்களுக்கு உள்ளாகவில்லை எனினும் உள்ளுறுப்புகள் சிதைவடைந்திருக்கலாம் எனத் தெரிவித்துள்ளனர்.

மீட்கப்பட்ட நபர் உடனடியாக வைத்திய பரிசோதனைகளுக்கு உட்படுத்தப்பட்டுள்ளார். பூகம்ப அதிர்ச்சியிலும் இந்த அபூர்வ சம்பவத்தினால் குடும்பத்தினர் மகிழ்ச்சி வெளிப்படுத்தியுள்ளனர்.

ஹெய்ட்டி பூகம்பத்தில் சுமார் 2 இலட்சம் பேர் வரை உயிரிழந்தமை குறிப்பிடத்தக்கது.

ஹெய்ட்டி நாட்டில் ஏற்பட்ட நிலநடுக்கத்திற்குப் பல்வேறு நாடுகள் உதவ முன்வந்துள்ளன. இந்நிலையில் அந்நாட்டுக்கு உலக வங்கியும் உதவ முன்வந்துள்ளது.

பூகம்பத்தால் பாதிக்கப்பட்டவர்களுக்கு உதவவும், இடிந்த கட்டடங்களை புதுப்பிக்கவும் 100 மில்லியன் அமெரிக்க டொலர் நிதியுதவி அளிக்க உலக வங்கி முடிவு செய்துள்ளது.

இந்தோனேசியாவில் நிலநடுக்கம்

ஹெய்ட்டியைத் தொடர்ந்து இந்தோனேஷியாவிலும் பயங்கர நிலநடுக்கம் ஏற்பட்டது. இந்தோனேஷியாவின் பப்புவா மாகாணத்தில் இந்நிலடுக்கம் ஏற்பட்டது. ரிக்டர் அளவுகோலில் இது 6.2ஆக பதிவாகியுள்ளது.

எனினும் நிலநடுக்கத்தால் சுனாமி எச்சரிக்கை எதுவும் விடப்படவில்லை. மேலும் நிலநடுக்கத்தால் ஏற்பட்ட சேதங்கள் குறித்து உடனடி தகவல் ஏதும் அறிவிக்கப்படவில்லை.