REFUGEE

கொழும்பு மெகசின் சிறைச்சாலையின் அதிகாரிகளாலும் ஏனைய கைதிகளாலும் தாம் கடுமையாகத் தாக்கப்பட்டதாகத் தமிழ்க் கைதிகள் கூறியுள்ளனர்.

சிறைச்சாலை தமிழ்க் கைதிகள் இது தொடர்பான உண்மை நிலையை விபரிக்க சந்தர்ப்பம் வழங்குமாறும் அவர்கள் கோரிக்கை விடுத்துள்ளனர்.

மெகசின் சிறைச்சாலையில் தமிழ்க் கைதிகள் தாக்கப்பட்டதாகக் கிடைத்த தகவலையடுத்து ஐக்கிய தேசியக் கட்சியின் கம்பஹா மாவட்ட நாடாளுமன்ற உறுப்பினர் டாக்டர் ஜயலத் ஜயவர்தன அங்கு சென்ற போது, தமது நிலைப்பாட்டை தமிழ்க் கைதிகள் மிகவும் கவலையுடன் கூறியதாக அவர் எமது இணையத்தளத்துக்குத் தெரிவித்தார்.

இது தொடர்பாக அவர் மேலும் கருத்து தெரிவிக்கையில், "இந்த சம்பவம் பற்றி அறிந்தவுடன் நீதி மற்றும் மறுசீரமைப்பு அமைச்சர் மிலிந்த மொறகொடவுக்கு அறிவித்துவிட்டு, உடனடியாக மெகசின் சிறைச்சாலைக்கு சென்று பாதிக்கப்பட்ட கைதிகளுடன் உரையாடினேன். கழுத்து, வயிற்றுப் பகுதிகள் கடுமையாக தாக்குதலுள்குள்ளான 5 பேர் மிகவும் பரிதாபகரமான முறையில் என்னிடம் நடந்த சம்பவத்தைக் கூறி முறையிட்டனர்.

இன வித்தியாசம் பார்த்து தமிழ்க் கைதிகள் தாக்கப்படுவதைப் பொறுப்புள்ள அமைச்சு தடுத்து நிறுத்த வேண்டியது அவசியமாகும். அவர்களுக்கு நடந்த சம்பவத்தை வெளிப்படையாகக் கேட்டறிந்து நடவடிக்கை எடுக்குமாறு சிறைச்சாலை ஆணையாளரிடம் கேட்டுள்ளேன்" என்றார்.

கொழும்பு மெகசின் சிறைச்சாலையில் இன்று காலை தமிழ்-சிங்கள கைதிகளிடையே கைகலப்பு ஏற்பட்டதாக முதலில் தெரிவிக்கப்பட்டது.

பிரதி நீதி அமைச்சர் வி. புத்திரசிகாமணியிடம் இது குறித்து கேட்ட போது, பெரிதாகப் பிரச்சினை எதுவும் ஏற்படவில்லை என்றும் கைதிகளிடையே வாய்த்தர்க்கம் மட்டுமே ஏற்பட்டதாகவும் சிறைச்சாலை ஆணையாளர் தெரிவித்ததாக எமது இணையத்தளத்துக்குத் தெரிவித்தார்.

கொழும்பு மெகசின் சிறைச்சாலைக்கு நேரில் சென்று, உதவி சிறைச்சாலை ஆணையாளர் கெனத் பெர்னாண்டோவிடம் நாம் கேட்ட போது,

"இன்று காலை 8.30 மணியளவில் கைதிகளைக் கணக்கெடுப்பதற்காக அதிகாரி ஒருவர் தமிழ்க் கைதிகள் தடுத்து வைக்கப்பட்டிருந்த பிரிவுக்குச் சென்றிருந்த சமயம், அங்கிருந்த கைதி ஒருவர் இவர் மீது கல்லெறிந்துள்ளார்.

இதனையடுத்து அங்கிருந்த சிங்கள கைதிகளுக்கும் தமிழ்க் கைதிகளுக்கும் இடையே வாக்குவாதம் ஏற்பட்டது. வாய்த்தர்க்கத்தில் ஈடுபட்ட கைதிகளைச் சிறைச்சாலை அதிகாரிகள் தடுத்து நிறுத்தினர். இதன் போது எவருக்கும் காயம் ஏற்படவில்லை" என்றார்.

இது குறித்து தொடர்ந்து விசாரணைகள் இடம்பெற்று வருவதாகவும் உதவி சிறைச்சாலை ஆணையாளர் கெனத் பெர்னாணாண்டோ தெரிவித்தார்.

வெலிக்கடை சிறைச்சாலையில் இன்று காலை தமிழ்-சிங்கள கைதிகளிடையே கைகலப்பு ஏற்பட்டதாகத் தெரிவிக்கப்பட்டது.

இதனையடுத்து பிரதி நீதி அமைச்சர் வி. புத்திரசிகாமணியிடம் இது குறித்து கேட்ட போது, பெரிதாகப் பிரச்சினை எதுவும் ஏற்படவில்லை என்றும் கைதிகளிடையே வாய்த்தர்க்கம் மட்டுமே ஏற்பட்டதாகவும் சிறைச்சாலை ஆணையாளர் தெரிவித்ததாக எமது இணையத்தளத்துக்குத் தெரிவித்தார்.