நேய நாயகி
உடல்களை தின்பது குறித்தகரையான்களுடனான உரையாடலின்
போது யட்சி வந்தாள்
முனீஸ்வரனுக்கு படைத்த சாராய
புட்டியை திருடிக் கொண்டு
கைமாற்றிய மிடறில் துரு வாசனை அடித்தது
இறந்த குழந்தை வளர்ந்த படி இருக்கும்
கனவுடையவளின் கூடலை ஆசிர்வதித்தாள்
பெரு வியாதிக்காரனின் மரணத் திகதியை
தாயம் ஆறுக்கு மாற்றி வைத்தாள் ஆட்டத்துக்கு
நடுவே
பின் இருவரும் சன்னாசி அப்பன் திடலுக்கு சென்று
தலைச்சன் பிள்ளை தலை மழிக்கும் விருந்தில்
கிடா இரத்தம் குடித்துக் கொண்டிருந்தவனிடம்
சுருட்டு வாங்கி குடித்தோம்
சித்தன் ஆடைகளை பிழிந்து தோள் மீது
போட்டுக் கொண்டு ஓட்டை மடையில்
குடலை சைக்கிள் டியுபில்
பஞ்சர் பார்ப்பது போல் கழுவிக் கொண்டிருந்தான்
யட்சி தொடையில் கிள்ளி கண்ணடித்து
இரண்டையும் இடம் மாற்றினாள்
அடியே கருவாச்சி வந்துட்டியா
எங்க மூக்குச் சில்லு ஒடயாத பயலோட
என்றான் சித்தன் திரும்பாமலே
கரட்டுப் பக்கம் முனியாட்டம் பார்க்கலாமுன்னுதென்
என்றாள் தோளோடு அணைத்தபடி
சன்னாசியும் அய்யனும் குருத பூட்டுர
சாமமாச்சுது பொழுதோட போ தாயி என்றான்
மூன்றாம் சாமமிருக்கும் படுக்கையில்
புரண்ட போது சலங்கையொலிக்க குதிரைக் குளம்படி
பெரும் செருமலுடன் கடந்தது
பானக வாசத்தில் ப்ரம்ம வேளையில் விழித்த பொது
கழுத்தில் யட்சியின் கருகமணி
தங்கை பூட்டின வீட்டிற்குள்
எப்படி நுழைகிறேனென்ற ஆதிக்கேள்வியை இன்றும்
துவங்கிய போது மஞ்சள் குளித்த பிள்ளைக் கனவுக்காரி
வாசல் கடந்தாள்
சுழித்த புன்னகையுடன்
0 Response to "நேய நாயகி"
แสดงความคิดเห็น